قالوا الخضرا في سليانه 
موجوعه بتربة البرور 
زينه في يدين الحنّانه 
فوّاحه بريحة البخور 
تحوّس في جبال بفرنانه 
صغيره تصيّد في الزرزور 
الخضرا في الضّحكه الزّعبانه 
كي اطيّح حرف الياجور 
تراها حتّى في الجبّانه 
كي دمّ الشّهيد يثور 
حرّه مقديّه وفنّانه 
أما خساره الوقت يدور 

خضرا في عرق البنّايه 
كي تولّي العيشه مرّار 
الخضرا في العين البكّايه 
كي يملى القلب الدّمار 
قالوا الخضرا ورا السّدّايه 
تهدي غدوه للأحرار 
الخضرا في النّجمه الضّوّايه 
توعد بعد اللّيل نهار 
الخضرا تحضّرلي في غدايا 
بإيديها تمحمش في الناّر 
الخضرا تقاسمني الجرّايه 
وقت نشوف الجنّه جهار 
الخضرا في ساقين حفايا 
على رمله تخبّي الأسرار 
الخضرا في النّسمه لفي سمايا 
في ضحكة أولاد صغار 
الخضرا في الحلمه النّسايه 
لعبه في يدين السّمسار 
الخضرا في تعبي وشقايا 
في صغري الخلّاني وطار 
الخضرا في حواجب بابايا 
فغزره تحكّرها الكبار 
« الخضرا في كلمة « يا ضنايا
تورّثني الظّلم الّي صار 

الخضرا ساموها الشّرايه 
يا وليدي كثروا التّجار 
وكثروا السّمساره في دايا 
قسموها يمين يسار 
بفلوسي علّا البنايه 
بانيها الكلّها بلّار 
معمّر بيروات عدايا 
بجنينه فيها النّوار 
ونا نكلت والشّوك حذايا 
في شهيلي يكوي بالنّار 
نار تشعّل حلمي معايا 
تكسّر قلبي كالفخّار 
نتعب ونكلت يا شقايا 
باش نبني قصور المنار 
ويني هالثّوره النّسايه 
تي وينوا حقّ الثّوار 
يا خضرا لازمنا هدايه 
ويطلع نبينا من الغار

أمين عبيدلّي

A propos de l'auteur

Laisser un commentaire

Votre adresse e-mail ne sera pas publié.